Sociaal Werker ይመሃረሉ ኣብ ዝነበርኩ ግዜ ኣብታ መወዳእታ ዓመት afstudeerrichting ወይ መዛዘሚ መልክዕ ናይቲ ሞያ ንሓደ ዓመት ዝኸይድ ፕሮጀክት ክሕንጽጽን ክመርሕን ኔሩኒ። እዚ ኣብ 2023 mei ምዃኑ እዩ። ሽዑ ኣብ ሓንጎለይ ዝመላለስ ዝነበረ ሕቶ ኸኣ “እዚ ናይ መካነ-መቓብር ሕቶ ናይ ሕብረተሰብና” ብኸመይ ክምለስ ይኽእል ዝብል ሓሳብ ይመጻኒ ኔሩ። ብዙሕ ግዜ ኣውሪደ ኣደይበ ኸኣ ኣብ መወዳእታ ሓደ ናይ “ኢንቹራንስ” ኣገልግሎት ዝህብ ትካል ክትከል ኣለዎ። እዚ ትካል እዚ ኸኣ ነቶም ኣባላቱ ንመካነ-መቓብር ዝከውን ቦታ ከዳልወሎምን ክገዝኣሎምን ይኽእል እዩ ናብ ዝብል መደምደምታ በጺሐ። ካብዚ ብምቕጻል ኣብቲ ዓውዲ ኣፍልጦ ምስ ዘለዎም ትካላትን፡ ኣብ ከምዚ ዝኣመሰለ ሕቶታት ኢንቨስት ክገብሩ ምስ ዝኽእሉ ትካላትን ኣካላት መንግስትን ከኣ ርክብ ፈጢረ።

ኣብ መወዳእታ ኣነ ዘቕረብክዎ ሕቶ እንተ ኔሩ፡ “ሕብረተሰበይ ንሰብ ዘይግበኦ በደል ይበጽሖ ኣሎ” ኣነ ኸኣ ብሞያይ ሓደ ንሕብረተሰበይ ክጠቅም ዝኽእል ትካል ብምትካል “ነቲ ዘሳቅዮ ዘሎ ጸገም” ክቕንጥጦ ይኽእልን ይደልን እየ። ኣብዚ ዓውዲ እዚ ትካላትን መሓውራት መንግስትን ኔዘርላንድ እንታይ ክሕግዙኒ ይኽእሉ? ዝብል ሕቶ ነበረ! ጎድኒ-ጎድኒ እዚ ድማ ኣብቲ Sociaal Werker ዝመሃረሉ ቤት-ትምህርቲ ከም afstudeerrichting Sociaal ondernemerschap ዝበሃል ዓውዲ መሪጸ የጽንዕ ኔረ። እዚ ከምዚ ኢሉ እና ሃለወ ኸሎ፡ እቲ ንዓይ Sociaal Ondernemerschap ዘምህረኒ ዝነበረ ቤት-ትምህርቲ፡ እዚ ንስኻ ሓቲትካዮ ዘለኻ ሕቶን ኣጺዲቕካዮ ዘለኻ ፕሮጀክትን፡ ናይ ሕብረተሰብ ሕቶ እዩ። ኣብዚ ንስኻ ትዛረበሉ ዘለኻ ኣርእስትታት ብልቓሕ ኢንቨስት ክገብሩ ዝኽእሉ ትካላትን ኣካላት መንግስትን ድማ ኣለዉ። ስለዚ እቲ ሕቶኻ ቅኑዕን ምኽንያታውን ስለ ዝኾነ ምስኦም ክነራኽበካ ኢና። ንሶም ውን ነዚ ንስኻ ሓቲትካዮ ዘለኻ ሕቶ ብኸመይ ናብ ተግባር ይልወጥ ክሕግዙኻ እዮም። ካባና ዘድሊ ዘበለ ኩሉ ምትሕብባር ድማ ኣይንበቀልካን ኢና ኢሉኒ።

ተወሳኺ ኣብ ትምህርትኻ ትኸዶ ዘለኻ ከይድታት ውን ጽቡቕ ስለ ዘሎ፡ ኣብቲ ንሶም ንስደተኛታት ዝህብዎ ስልጠናን፡ ክሳብ ሽልማት ዝኸይድ ውድድርን ምእንታን ክትሳተፍ ውን እቲ ናቶም ፕሮግራም ጀሚሩ ክሳብ ዝውድእ፡ ኣብ ሰሙን ሓንቲ መዓልቲ ኣብኡ ክትሳተፍ ኣፍቂድናልካ ኢና። ኣብኡ እንተ ተሳቲፍካ ኣብ ትምህርቲ ከም ዝወዓልካ ውን እዩ ዝሕሰብ ኢሎም ሞራል ኣስኒቖምኒ። ኣነ ኸኣ ንዝተዋህበኒ ዕድል ተጠቂመ፡ ኣብ ሓደ ግዜ ኣብ ክልተ ቤት ትምህርቲ እና ተመላለስኩ መደበይ ብዓወት ዛዚመዮ። እቶም ትካላት ኣብ ሓደ ዓመት ናይ 10 ሰባት ሕቶ ጥራሕ እዮም ዝምልሱ ኔሮም። ኣብ 2023 ዝተሓጸዩ ተመሃሮ፡ ኣብ 2024 ንሽልማት ይሕጸዩ። ኣብ 2024 ዝጀመሩ ተመሃሮ ኸኣ ኣብ 2025 ናቶም ፕሮጀክት ተመርሚሩ ንሽልማት ይቐርቡ። ኣነ ናብዞም ትካላት ኣብ januari 2024 ስለ ዝተሓወስክዎም ናተይ ሕቶ ኣብ 2025 ክረአ ዝግበኦ ዝነበረ፡ ቀዳማይ ዙር ከይተወድአ ኸሎ ሃንደበት ጸዊዖም ኢንተርቪው ጌሮምለይ። መበል 11 ፕሮጀክት ኾይኑ ኣብ 2024 ክረአ ኸም ዘለዎ ኸኣ ወሲኖም። እዚ ዝወሰንሉ ምክንያት ኣነ ዘቕረብክዎ ሕቶን፡ ክተኽሎ ዝሓሰብኩ ትካልን ረዚን ኮይኑ ስለ ዝተረኽበ እዩ ዝብል ግምት ኣለኒ። ኣብ መወዳእታ ኸኣ ኣብቲ ናይ ኩለን ዞባታት ዝሳተፋሉ ሃገራዊ መድረኽ ክሳተፍ ምዃነይ ተነጊሩኒ። 

ኣነ ምስ ካልኦት ስደተኛታት ክሳተፈሉን ክወዳደረሉን ዝጸናሕኩ ኩነታት እንታይ`ዩ?

እቲ ኣነ ክወዳደሮ ዝጸናሕኩን ዘለኹን መድረኽ፡ ንስደተኛታት ጥራሕ ዝወሃብ ውድድርን ስልጠናን ኮይኑ፡ ኣብ ሰሙን ሓንቲ መዓልቲ ብኣካል ተረኺብካ፡ Ondernemingsplan ትጽሕፈሉን፡ ፕሮጀክትኻ ኢንቨስት ክገብሩ ምስ ዝኽእሉ ባንክታትን ትካላትን ኣካላት መንግስትን ተላልየሉ ዓውዲ እዩ። እዚ ፕሮግራም እዚ ብሕብረት ኤውሮጳን ብመንግስትን ትካላትን ኔዘርላንድስን ዝዳሎን ዝምወልን እዩ። ብጠቅላላ እቲ ፕሮግራም 3 ደረጃታት ኣለዎ። እቲ ቀዳማይ ደረጃ 8 ወርሒ ይወስድ። እቲ 2ይ 9 ወርሒ፡ እቲ 3ይ ደረጃ ድማ ካብ 12 – 24 ኣዋርሕ ይወስድ። ካብቶም ነዚ ዝምውሉ ትካላት ንምጥቃስ ዝኣክል Social Enterprise Nederland, Qredits, VNG, en Europese Unie እዮም። እቲ ፕሮጀክት ንኽዕወት፡

1. ኣብ 1^ይ መድረኽ ፕላን ወይ ስትራተጂ ትሕንጽጽ።                                                

2. ኣብ 2^ይ መድረኽ፡ ካብ ስእለት-ኣእምሮ (ካብ ወረቐት) ናብ ተግባር ትቕይሮ።

3. ኣብ 3^ይ መድረኽ፡ ከመይ ኢሉ ክዓቢ ከም ዘለዎን፡ ውጽኢታዊ ይኸውንን ውጥን ትሕንጽጸሉን ተዕብዮን።

ኣነ ኣብ ወርሒ ሓደ 2024 ስለ ዝተጸምበርክዎም፡ ኣብ 1^ይ ክህሉ እዩ ዝግበኣኒ ዝነበረ፡፡ እንተ ኾነ ረዚን ሕቶን ንሕብረተሰብ ዝጠቅም “ፕሮጀክትን” ስለ ዘቕረብኩ፡ መጀመርታ ነቲ 1^ይ ከይወዳእክዎ ከለኹ፡ ኣብ ካልኦት Sociaal Ondernemers ዝተኣከብሉ መድረኻት ከይደ “ንፕሮጀክተይ” ከላልዮን ምስ ካልኦት ሃገራት ከም ብዓል ቤልጁም፡ ሽወደን፡ ሉክሶምበር፡ ኢትዮጵያ፡ ኡጋንዳ፡ ማሊ ክራኸብ ዕድል ፈጢሮምለይ፡ ኣብ ርእሲኡ ድማ ንኻልኦት 2 ሰባት መሪሐ ካብ ዞባዊ ናብ ሃገራዊ መድረኽ ከምርሕ ተፈቒዱኒ። 

ተልእኾን ዕላማን ናይዚ ምዕራፍ ዝበሃል ፕሮጀክት እንታይ እዩ?

ናይ ምዕራፍ ተልእኾ እዞም ዝስዕቡ እዮም...

1. ንሕብረተሰብ ኤርትራን ኢትዮጵያን ናይ ኢንቹራንስ  ኣገልግሎት ምሃብ። 

2. ነቶም ኣብ ኤርትራ ኣትዮም ክቕበሩ ዘይፍቀዶም ኤርትራውያን ወይ ኣብ ኣፍሪቃ ኣብ ዓለም ሙሉእ ንዘለዉ ኤርትራውያን፡ ወይ ከኣ ኣብ ኤውሮጳ ን ኣብ ኣውሮጳ ጥራሕ ዝነብሩ ኤርትራውያን መካነ-መቓብር ምግሃድ። 

3. ኣብቲ ንሕብረተሰብና ነዳልዎ ን መካነ-መቓብር ዝኸውን ቦታ፡ ስድራ ቤታት ፍቓደኛታት እንተ ኾይኖም እቶም ኣብ ኢታሊ፡ ኣብ ፍራንስን ኣብ ካልእ ቦታታትን ዘሎ ሬሳታት ኤርትራውያን ውን ኣብ ግምት ዘእተወ ቦታ ክግዛእን፡ ሬሳታት ኤርትራውያን ኩነታት ሃገርና ክሳብ ዝቕየር ኣብ ሓደ ቦታ ምጥርናፍን።

4. ምእንቲ መስደዲ ሬሳ ዝዋጻእ ገንዘብ ኣብ ሕብረተሰብና ክውገድን፡ ነብሲ ወከፍ ሰብ ናይ ገዛእ ርእሱ ሓላፍነት ከም ዝስከም ምግባርን፡ ኢንቹራንስ ብምሃብ ቁጠባ ምፍጣርን። 

5. ካብ ሆላንድ ወጻኢ ኣብ መላእ ኣውሮጳ ንሕብረተሰብና ናይ ኢንቹራንስ ኣገልግሎት ምሃብ። 

6. እቲ ኣብ ኣፍሪቃ ወይ ኣብ ኣውሮጳ ዝገሃድ መካነ-መቓብር፡ ንኹሎም ሃይማኖታት ሕብረተሰብ ኤርትራ ኣብ ግምት ዘእተወ ስለ ዝኾነ፡ ኩሎም ተጠቀምቲ ክኾኑን፡ ተወሳኺ ኣብ ስደት ካልእ መካነ-መቓብር ከይግዛእ ምስ ሕብረተሰብን ኣብያተ ክርስትያንን ሕጋዊ ውዑል ምግባር። ምኽንያቱ 1ይ ክቡር እዩ ብዙሕ ገንዘብ ውን እዩ ዝሓትት። 2ይ ሕብረተሰብና ካብ ድኽነት ከይወጽእ ኣሲሩ ክሕዞን ከሳቕዮን እዩ፡፡ ነዚ ናይ ምዕራፍ ተልእኾ ውን ከተዓናቕፎ እዩ። ሕጽር ብዝበለስ እዚ ናይ ምዕራፍ ፕሮጀክት ክዕወት እንተ ሰሪሕናሉ፡ ከም ሕብረተሰብ ንኹልና ከም ዝኣክል እዩ ክኸውን። ኩላተን ኣብያተ እምነታት ሕብረተሰብና ድማ ኣብዚ ፕሮጀክት ክሳተፋ ዕዱማት እየን።